Haryana BJP sorkar aṭangin MLA pathum inhnukdawk

Haryana-a rorel lai, Bharatiya Janata Party (BJP) kaihhruai sorkar aṭangin independent MLA pathumin BJP an thlawpna an hnuhdawh thu leh, Congress an thlawp tawh zawk tur thu an sawi.

Independent MLA pathum; Sombir Sangwan, Randhir Singh Gollen leh, Dharampal Gonder te chuan Rohtak-ah BJP sorkar aṭanga an inhnuhdawh thu hi an puang a, he hunah hian state Congress president, Chaudhary Udaibhan leh Haryana assembly house-a eptu party hruaitu, Bhupinder Singh Hooda te an tel a ni.

MLA pathumte hian BJP sorkar kal dan chu mipuite'n an hmuh tawh thu leh an khawtlanga mi tinte chu hnathawh tur nei lo, thil man sang leh suahsualna pung zelin a nghawng vek tawh thu sawiin, BJP sorkar chu hun pek zel chi nia an ngaih loh thu an tarlang.

Congress president, Chaudhary Udaibhan chuan thu sawi ve bawkin, MLA pathum inhnuhdawhna bakah kum tira Jannayak Janta Party (JJP)-in BJP an thawhpuina an tihtawp tawh avangin BJP chu sorkarna siam thei dinhmuna an din tak loh thu a sawi a, Haryana chu Presidents' rule hnuaia dah vat a, assembly inthlan neih thuai a ṭul thu a sawi bawk.

Haryana assembly-ah hian member 90 awm theiin, Kum 2019 assembly inthlanah khan BJP hian party malin MLA 40 an nei a, MLA 10 nei, Jannayak Janta Party (JJP) nen thawk dunin sorkarna an siam a ni. Hetih lai hian JJP hian kumin March thla khan BJP nena an thawh dunna chu titawpin, BJP hian independent MLA paruk thlawpna chiah neiin sorkarna an siam chhunzawm a ni. Tun dinhmunah Haryana-ah hian assembly seat pahnih a ruak a, hei vang hian member awm zawng zawng 88 aṭanga sorkarna siam tura MLA neih ngai zat chu 45 a ni. Independent MLA pathumin BJP an thlawpna hnuhdawh tak avang hian BJP sorkar hian MLA 43 an nei mek. Sorkarna siam chhunzawm tura BJP-in MLA neih ngai zat an tlin tak loh avang hian eptu party lian ber, MLA 30 nei Congress chuan Haryana assembly inthlan neih a ṭul thu an sawi chhuak nghal bawk.