Nijjar thattua rinhlelh mi pathum Canada court-ah inlan

Canada rama Khalistan firfiak hotu pakhat, Hardeep Singh Nijjar thah a nih chungchangah Canada sorkar chuan Nijjar thattu nia a rinhlelh, India mi pathumte chungthu ngaihtuahin, Thawhlehni khan heng mi pathumte hi court-ah an inlan.

Canada sorkarin India mi a man, Nijjar thattu nia a puhte hi; Karan Brar, Kamalpreet Singh leh, Karanpreet Singh te an ni a, an vai hian Edmonton-a khawsa niin tualthah tumna leh first degree murder thubuai awihtir an ni. Thawhlehni khan Vancouver-a British Columbia province Surrey provincial court chuan an chungthu hi ngaihtuahin, heng mite hi tualthat ṭhin pawla mi an nih rin a ni a, court hmaah hian video kaltlangin an inlan a ni.

Nijjar thah thubuaia mi pathum mante chungthu ngaihtuah a nih hian court pawnah Khalistan thlawptu mi eng emaw zat an pung khawm a, court thu ngaihtuah ngaihthlak duh avang hian courthouse-ah hian mi 50 leng room dang siam belh a ngai hial bawk.