Arvind Kejriwal bail-a chhuah chungchangah Supreme Court-in vawiinah thutlukna a siam dawn

Justice Sanjiv Khanna ṭhut Supreme Court bench chuan vawiin hian Tihar jail-a awm mek, Delhi chief minister, Arvind Kejriwal-a bail-a chhuah a nih dawn leh dawn loh chungchangah court thutlukna puan a nih tur thu a sawi.

Delhi excise policy thubuai kaihhnawiha pawisa chheprelha puha man, Arvind Kejriwal hian March 21-a Enforcement Directorate (ED)-in an man dan chungchangah dan an bawhchhia nia sawiin, Supreme Court-ah hian petition a theh lut a ni. Hei bakah hian Lok Sabha inthlan neih meka campaign a neih ve theih nan bail a dil bawk.

Justice Sanjiv Khanna ṭhut bench chuan Kejriwal-a petition hi ngaihtuahin, bail-a chhuah theih a nih dawn leh dawn loh chu May-10-a puan a nih tur thu a lo sawi tawh a, hemi ni vek hian Kejriwal-a petition theh luh chhan tak, man a nih chungchanga dan bawhchhiatna awm nia a sawi pawh an ngaihtuah tel tur thu a sawi tel bawk a ni.

Kejriwal-a'n ED a khinna leh bail-a chhuah tura a dilna hi Supreme Court chuan a ngaihtuah mek a, May 7 khan bail a dilna chungchangah hian thutlukna siam loin a chawlhsan lailawk a ni. Bail a dilna ngaihtuah a nih lai hian ED aiawha ding, Additional Solicitor General, Tushar Mehta chuan Lok Sabha inthlan campaign a ṭul avanga Kejriwal-a laka zahngaihna lantir chu ṭul a tih loh thu sawiin, bail pek a nih chuan court rorelnaah politician-te tan dan hran a awm angin a ngaih theih dawn a ni, a ti.

Arvind Kejriwal hian ED-in an man chungchangah hian dan bawhchhiatna a awm tiin Delhi high court-ah pawh petition a lo theh lut tawh a, mahse, high court hian April 9 khan dan bawhchhiatna a hmuh loh thu sawiin, Kejriwal hi Tihar jail-ah dah chhunzawm a ni. Hetih lai hian Delhi rouse avenue court chuan Kejriwal hren a nih hun chhung tur hi May 20 thleng a lo pawtsei ve bawk.