Air India Express-in thlawhtheihna 74 cancel, thawktu 30 an ban

Air India Express chuan an hnuaia thawktu (cabin crew) mi 300 zetin damloh chhuanlama chawlh an lak avang leh, biakpawh theiha an awm loh avangin thlawhtheihna 74 zet an cancel phah a, mi 30 an ban bawk.

Air India Express hi Air India hnuaia awm, thlawhtheihna man tlawm zawka chûan theihna a ni a, Tata group-te'n an enkawl mek a ni. Air India Express-a thawktute'n damlohna avanga a ruala chawlh an lak avang hian Thawhlehni aṭang khan thlawhtheihna 100 chuang chu cancel a ni tawh a, hei hian passenger 15,000 chuang a nghawng ni. Heng thlawhtheihna cancel-te hi ram chhung leh ram pawna thlawk turte an ni hlawm a, thlawhtheihna ṭhenkhat chu nasa taka delay a nih phah bawk a ni.

CEO Aloke Singh chuan an harsatna tawh avang hian ni eng emaw ti chhung chu thlawhtheihna thlawk chhuak zat an tihtlem tur thu a sawi tawh a, thawktu indaih lohna avanga harsatna an tawh chu thawktu senior zawkte thiam loh niin a sawi zui bawk. Mi 30 an ban chungchangah CEO Singh chuan ruahmanna nei veka tepter tawh taka chawl an nih thu leh, chhan ṭha tak nei an nih loh vanga ban an nih thu a sawi tel bawk.

Damloh chhuanlama Air India Express-a thawktute chawlh lak chhan hi hnathawka inchhawrna chungchanga dan siam thar an duh loh vang niin an sawi a, thawktute chu angkhata en an nih loh thu leh, senior position atana interview paltlang vek si a hlawh hniam zawk hna thawk tura lak leh site an awm bawk nia tarlan a ni. Thawktu ṭhenkhat chuan compensation an dawn turah an hriat lawk loha tihdanglam a awm bawk niin an sawi. Air India Express thuneitute chuan thawktu chawlh la zawng zawngte chu nimin tlai dar 4 hmaa an hna ṭheuha let turin a hriattir tawh a ni.