Haryana-ah JJP-in Congress thlawp an tum

Haryana-a BJP sorkar paihthla a, sorkar thar siam turin MLA 10 neitu, Jannayak Janta Party (JJP) chuan MLA 30 nei, Congress thlawp an hreh loh thu an puang.

Haryana assembly-ah hian rorel lai BJP chuan MLA 40 neiin, sorkarna siam tur hian MLA 45 neih a ngai a ni. Nilaini khan BJP sorkar thlawptu independent MLA pathumin BJP an thlawpna an hnuhdawh thu leh Congress thlawp an tum thu puangin, BJP hian sorkarna siam tura MLA neih ngai zat an nei pha tawh lo a ni. Hei vang hian Congress chuan Haryana-ah hian presidents' rule puan a, sorkar siam tur thlan ṭhat a ṭul thu an sawi a, JJP hruaitu leh Haryana chief minister pawh lo ni tawh, Dushyany Chautala chuan BJP sorkar paihthlak a nih theih nan hian Congress thlawp tura an inpeih thu nimin khan a sawi a ni.

Kum 2019-a assembly inthlan neih a nih khan JJP leh BJP-te hi thawk dunin sorkarna an siam a, mahse, kumin March thla khan JJP hian Lok Sabha inthlan atana seat insem dan chungchanga an inrem theih loh avangin BJP nena an thawh dunna hi an titawp a ni. JJP hruaitu, Chautala chuan Congress kutah engkim a awm tawh thu sawiin, Lok Sabha inthlan a awm mek laia sorkar lai paihthla tura an inpeih reng thu a sawi.

JJP-in Congress thlawp an hreh loh thu an sawi hnu hian Congress hruaitu, Bhupinder Singh chuan JJP chuan governor hnenah BJP thlawp an tum loh thu ziaka an thlen a ngai a, chumi hnuah chuan governor hnenah presidents' rule puang tur leh inthlan ṭhat buatsaih turin kan nawr thei dawn a ni, tiin a sawi ve thung.