Arvind Kejriwal bail-a chhuah a ni

Delhi excise policy thubuai avanga Enforcement Directorate (ED)-in an man, Arvind Kejriwal-a'n bail a dilna chu nimin khan Supreme Court-in a ngaihtuah a, court hian Kejriwal hi June 1 thleng bail-a chhuah a phalsak.

Arvind Kejriwal-a bail dilna Supreme Court-in a ngaihtuah lai hian ED chuan Arvind Kejriwal bail dilna hi dodalin, Court-ah hian affidavit an theh lut a ni. ED hian inthlan campaign chhuanlama Kejriwal chhuah a nih chuan entawn tur ṭha lo tak a hnutchhiah tur thu leh, dan hnuaia ang khat vek kan nihna thaichhiat a ni dawn a ni tiin, politician-te pawhin thil sual an ti a nih chuan hrem tur an nih thu te, mipui nawlpui leh politician-te inkarah danglamna awm lo se an duh thu an sawi. ED chuan inthlan chu kum tina thil thleng reng a nih thu leh, campaign avanga politician-te bail pek an nih chuan tu mah man theih an nih loh tur thu Supreme Court hi an hrilh.

ED-in Kejriwal-a bail dilna an dodal avang hian AAP chuan complaint theh lut ve bawkin, court-in thutlukna siam tura ruahmanna a siam vek tawh laia ED-in dodalna an lantir chu dan rorelna palzutna a ni, an ti ve thung. AAP hian Kejriwal man a nih dan chungchangah hian ED chu thup nei leh thuneihna inpe sang lutukah puhin, thudik thup leh thu dik lo rinchhanah puhin, inthlanpui neih lai, Model Code of Conduct puan vek tawh hnua an thuneihna hman sual avanga Kejriwal-a manah an puh.

Supreme Court thuchhuahin a tarlan danin Arvind Kejriwal hi election campaign avanga ni 21 chhung bail-a chhuah a ni a, hei vang hian June 2-a Lok Sabha inthlan a zawhah thuneitute hnena inpe leh turin a hriattir nghal a ni.