JJP leh INLD te'n sorkar fiahna nei turin Governor hnenah thlen

Haryana assembly-a BJP sorkar aṭanga independent MLA pathumin an inhnuhdawh thu an puan hnuah Jannayak Janta Party (JJP) leh Indian National Lok Dal (INLD) te chuan Haryana Governor hnenah a rang thei anga bera sorkar fiahna (no confidence motion) nei turin an thlen.

JJP hruaitu leh chief minister pawh lo ni tawh, Dushyant Chautala chuan Governor Bandaru Dattatreya hnena ziaka thu an thlenah hian an party chuan sorkar lai, BJP chu an thlawp loh thu leh, sorkar thar siam tura party dang eng pawh an thlawp zawk tur thu a tarlang a, independent MLA pathumin BJP sorkar an chhuahsan thu leh, BJP chuan sorkarna siam tura MLA neih ngai zat an phak tawh loh avanga sorkar thar siam a ngaih thu te a tarlang tel bawk. INLD secretary general leh an MLA awm chhun, Abhay Chautala pawhin Governor hnenah hian sorkar fiahna nei tura thlen ve bawkin, BJP chu sorkarna siam thei an nih tawh loh thu a ziak tel bawk.

Haryana state assembly-ah hian 2019-ah inthlanah BJP leh JJP te hi thawk dunin chief miniser Nayah Saini kaihhruaiin sorkarna an siam a, mahse, kumin March thla khan JJP hian BJP an thawhpuina an titawp a ni. Assembly seat ruak pahnih tiam loin sorkar siam tur hian MLA 45 neih a ngai a, independent MLA pathumin BJP sorkar aṭanga an inhnuhdawh thu an puan leh hnuah eptu party-te chuan sorkar thar siam turin an nawr mek a ni.