Instagram video siam vangin Gujarat-ah vote thlak ṭha dawn

Gujarat-a Dahod Lok Sabha seat-a polling station pakhatah Instagram video siam a nih avangin vawiin hian vote thlak ṭhat a ni dawn niin Election Commission of India (ECI) chuan an puang.

Lok Sabha inthlan thawh thumna, Thawhlehnia neih zawh takah khan Gujarat-a Dahod constituency-a Parthampur polling station-ah BJP hruaitu pakhat fapa, Vijay Bhabhor chuan vote thlak lai hi video-a lain, Instagram lamah a post zui a ni tiin Congress chuan complaint an theh lut a, hei bakah hian a vote thlak lai chu live-in, midang tan vote a thlaksak bawk niin an sawi. Vijay Bhabhor hian vote thlakna hmuna EVM (electronic voting machine) leh VVPAT (voter verifiable paper audit trail) khawlte chu eng emaw chen din chilhin a video-ah hian a tilang bawk a ni.

Congress complaint theh luh bawhzui hian Gujarat Chief Electoral Officer (CEO) chuan ECI hnenah report a theh lut a, ECI hian May 7-a helai polling station-a vote thlak chu pawm theih loh leh awmze nei lo tia sawiin, vawiin hian vote thlak ṭhat turin ruahmanna a siam ta a ni. Parthampur polling station-a thil thleng avang hian election official; presiding officer, assistant presiding officer leh polling officer pahnih bakah police constable pakhat chu suspend an ni tawh.