Betul constituency-a polling booth paliah vote thlak ṭha

Election Commission of India (ECI) chuan Electronic Voting Machine (EVM) chhiat avanga Madhya Pradesh-a Betul constituency-a vote thlak ṭhat tura a ruahman chu nimin khan vote thlak ṭhat a ni.

Betul constituency-a EVM phurtu bus leh inthlan buaipuitute chetvelna hmuna kangmei chhuakin EVM ṭhenkhat a tihchhiat avangin ECI hian May 8 khan he constituency huam chhunga polling booth paliah vote thlak ṭhat tur thu hi a puang a ni. 2024 Lok Sabha inthlanah hian he bial aṭanga seat chuh candidate pariat an awm a, mahse, 1996 aṭang khan he bialah hian BJP hlir thlan tlin an la ni thung.

Betul constituency-ah hian inthlan thawh thumna, Thawhlehni khan vote thlak tawh a ni a, vote tla hi 72.65% vel a nih phak rin a ni. Nimina vote thlak ṭhat hi zing dar 7 aṭanga ṭan niin, tlai lam dar 6 thleng hawn a ni a, polling booth atan hian high school pathum leh primary school pakhat hman a ni. Betul-a election official pakhat chuan vote thlak ṭhate tan hian an kut vei lam zung lai chu chhinchhiah nan hman a nih tawh zawk thu a sawi a, inthlan ni bik atan hian inthlanna hmunahte dry day leh sorkar chawlh puan a nih thu a sawi tel bawk.