Kejriwal-a'n Delhi-ah road show a nei

Delhi chief minister, Arvind Kejriwal chuan Supreme Court-in ni 21 chhung atan interim bail-a a chhuah tir hnuah, Inrinni liam ta khan Delhi-ah press conference neiin, Lok Sabha inthlanpui neih tura atana campaign-in road show a nei nghal bawk.

Aam Aadmi Party (AAP) national convenor ni bawk, Kejriwal hi Delhi sorkarin a ṭhiah tawh, Delhi liquor police case-a inhnamhnawiha puhin Enforcement Directorate (EC) chuan March 21 khan an man a, Tihar Jail-ah ni 50 zet a tang hman a ni.

Delhi-a AAP office-a press conference a neihah, Kejriwal chuan man a nih tirh aṭanga BJP-in CM a nihna aṭanga bang tura an phut reng chunga a ban duh lohna chhante a sawifiah nghal. 'Chief minister post hi ka tana thil pawimawh ber a ni hran lo. Mahse chief minister ka nihna aṭanga ka ban lohna chhan chu thu dik tawk lo hmanga min bantir tuma min phiarruk vang a ni," a ti. "Prime Minister hian eiruk dona chungchang hi a hre duh tak zet a nih chuan, Arvind Kejriwal hnen aṭang hian zir rawh se. Kan minister-te ngei pawh eiru chu jail-ah kan dah mai a ni," a ti. Prime minister Narendra Modi chu a theih dan zawng zawnga AAP nawr beh tuma beiha puhin, AAP hruaitu palite chu jail-ah a thawn tir tawh a ni, a ti bawk. 'Hetianga an tih hian AAP hi a tawp mai dawn niin an ngai. Mahse AAP hi tihchhiat an tum nasat poh leh kan party hian hma kan sawn zual sauh zel ang," a ti.

Press conference a neih zawhah hian South Delhi constituency-ah Lok Sabha election campaign-na pualin road show a nei zui a, Delhi mipuite chu a ngai hman hle tih sawiin, amah duhsaktu leh a tana lo dilsaktute chungah lawmthu a sawi bawk a ni.

Supreme Court chuan Lok Sabha inthlanpui neih mek a nih vangin, Kejriwal hi an party tana a campaign ve theihna turin interim bail-a chhuah a phalsak a, inthlan thawh sarihna leh a tawpna ber tur, June 2-a inthlan zawh hnuah in surrender leh nghal turin a ti a ni.