Vawiinah Lok Sabha seat 96-ah inthlan thawh lina nei dawn

Lok Sabha inthlan thawh lina chu vawiin hian state leh union territory 10-a seat 96-ah neih a ni leh dawn.

April 19 aṭang khan inthlan hi neih ṭan niin, thawh thumna thleng khan constituency 285-ah vote thlak a ni tawh a ni. Inthlan thawh khatnaah khan vote 66.71%, thawh hnihnaah 66.14% leh thawh thumnaah 64.4% te a tla a ni.

Vawiina inthlan neihna turte hi Andhra Pradesh-a seat awm zawng zawng, seat 25-ah a ni dawn a, Bihar-ah seat 40 zinga seat 5-ah, Jharkhand-a seat 14 zinga seat 4-ah, Madhya Pradesh-a seat 29 zinga seat 8-ah, Maharashtra-a seat 48 aṭangin seat 11-ah, Odisha-a seat 21 zinga sat 4-ah, Telangana-a seat awm zawng zawng seat 17-ah, Uttar Pradesh-a seat 80 zinga seat 13-ah, West Bengal-a seat 42 aṭangin seat 8 leh, Jammu and Kashmir-a seat panga awm zinga seat pakhatah te a ni.

Inthlan thawh linaa candidate zingah hian Uttar Pradesh-a Kannauj biala ding Samajwadi Party (SP) hruaitu Akhilesh Yadav te, West Bengal-a Krishnaagar biala TMC candidate Mahua Moitra, Baharampur biala TMC candidate Indian cricketer hlui Yusuf Pathan, Bihar-a Begusari-a BJP candidate union minister Giriraj Singh, Andhra Pradesh-a Kadapa biala ding state Congress president YS Sharmila, Barhana-Durgapur bial mektu BJP MP nilai SS Ahluwalia bakah Hyderabad constituency-a ding All India Majlis-E-Ittehadul Muslimeen (AIMIM) hotu lu ber Asaduddin Owaisi te an tel.