'Tumahin CAA hman tur hi an dang thei lo' : PM Modi

Prime minister Narendra Modi chuan nimin khan West Bengal-a Barrackpur-ah election rally a nei a, West Bengal-a rorellai, Trinamool Congress (TMC) chu na taka beiin, an state-a Citizenship Amendment Act (CAA) hman tur chu tumahin an dang thei lo tiin a sawi.

West Bengal chief minister Mamata Banerjee leh TMC hian CAA hi na takin an dodal a, an state-ah hman a ni ve dawn lo tihte an lo sawi tawh a ni.

Prime Minister chuan Bengal mipuite tan thil panga a tiam tih sawiin, sakhaw behchhanin reservation chu tumahin an pe thei lo a; hei vang hian SC, ST leh OBC tana reservation chu khawih danglam a ni dawn lo, a ti. Ram Navi lawmna pawh tumahin an dang thei lo a, Supreme Court-in Ram Mandir chungchanga a thutlukna chu tihdanglam a ni lo ang a, CAA hman tur pawh tumahin an dang lo ang, a ti. Eptu party-te chuan CAA chungchangah mipuite rilru hruai kawi tumin, thil ṭha lo leh hlauhawm tak angin an lantir a, CAA chu khua leh tui nihna pekna tur a ni a, midang khua leh tui nihna a buai phah dawn lo, a ti. Bengal-ah dan loa lutte chu TMC venhimna hnuaiah an duh thala an awm thu a sawi bawk.