Lok Sabha inthlan thawh lina neih zawh a ni

Lok Sabha inthlanpui 2024 neih mekah nimin khan state leh Union Territory 10-a constituency 96-ah a thawh lina atan vote thlak leh a ni. Thawh linaa inthlang, constituency 96-ah hian vote nei mi vbc. 17.7 an awm a, vote thlak hun hi zing dar 7 aṭanga tlai dar 6 thleng hawn a ni.

Hriat theih chinah constituency zawng zawnga vote tla hi 52.6% a tling tawh a, Andhra Pradesh-a constituency awm zawng zawng 25-ah 55.49% vote a tla a, Telangana-a constituency awm zawng zawng, seat 17-ah 52.34% vote a tla bawk. Bihar-ah constituency 5-ah inthlangin, 45.23% vote a tla tawh a, Jammu & Kashmir-a inthlang seat pakhatah vote 29.93% tlain, Jharkhand seat paliah 56.42% vote a tla tawh. Madhya Pradesh-ah hian seat pariatah inthlangin 59.63% vote a tla ve tawh bawk a, Maharashtra-a seat 11-ah 42.35% tlain, Odisha-a seat paliah 52.91% vote a tla tawh. Uttar Pradesh-ah seat 13-a inthlangin vote 48.41% tla tawh bawkin, vote tlak ṭhatna ber, West Bengal-a seat pariat inthlangah 66.05% vote a tla tawh bawk a ni.

Election Commission of India (ECI)-in an tarlan danin, Andhra Pradesh hmun ṭhenkhatah buaina tenau a chhuak a, Uttar Pradesh-ah inthlan boycott an awm bawk. West Bengal leh Odisha polling booth ṭhenkhatah Electronic Voting Machine (EVM) chhia a awm bawk.

Nimina inthlang constituency-ahte hian candidate langsar tak tak zingah union minister, Giriraj Singh bakah, Arjun Munda, Ajay Mishra Teri, Akhilesh Yadav, Asaduddin Owaisi, Congress MP, Adhir Ranjan Chowdhury, YS Sharmila leh Mahua Moitra te an tel a ni.