China ramria kawngpui siam nan Rs. vbc. 215 ruahman

Sorkar laipui chuan India leh China inrinaa kawngpui kilometre khat zel siam nan Rs. vbc. 2 vel zel ruahman a nih thu a puang. Heng kawngpuite hi Vibrant Village Programme (VVP) hnuaia Uttarakhand leh Sikkim-a siam tur a ni.

Ministry of Home Affairs (MHA) thuchhuahin a tarlan danin, VVP hnuaiah hian Uttarakhand-a Pithoragarh district-ah Rs. vbc. 119 sengin km. 43.96-a thui kawngpui siam tur a ni a, hei hi km. khat zela Rs. vbc. 2.7 anga chhut a ni. North Sikkim-a Chungthang leh Mangan block-ah te kawngpui, km. 18.73 leh thir lei metre 350-a sei siamna turin Rs. vbc. 96 pek chhuah tawh a ni bawk a, hei hi km. khat zela Rs. vbc. 2.4 ngai tur anga chhut a ni bawk. MHA chuan state sorkarte chu kawngpui siam hnathawh vil uluk tura hriattirin, kawngpui siam nana hman lirtheiah GPS dah vek turin a hriattir bawk.

VVP hi February 15, 2023 khan union cabinet chuan Arunachal Pradesh, Himachal Pradesh, Sikkim, Uttarakhand leh, Ladakh-a khaw 2,967 huam chhunga block 46 leh district 19 tuam chhuak turin a pawm a, hei hi ramri aṭanga raltlan lo lut, ramri bul khuaa mihring pung chak lutuk ven nan a ti a ni. VVP hnuaia hmalakna atan hian Financial year 2023-2024, 2024-2025 leh 2025-2026 chhunga hman turin Rs. vbc. 4,800 ruahman a ni a, heta ṭanga Rs. vbc. 2,500 hi kawngpui siam nana hman tur a ni.

Ministry of Home Affairs (MHA) chuan thla nga liam ta chhung khan VVP hnuaiah hian Arunachal Pradesh, Sikkim leh Uttarakhand-a China ramriahte kawngpui 113 siamna turin sum a pe chhuak tawh a, Arunachal Pradesh-ah hian kawngpui 105 siam tum a nih bakah Uttarakhand-ah kawngpui panga leh Sikkim-ah kawngpui pathum siam turin a pawm tawh bawk.