Delhi-a damdawi in ṭhenkhat leh IGI airport-in bomb tipuaha vauna dawng

Delhi-a Indira Gandhi International (IGI) airport leh damdawi in pariatte chuan email hmangin bomb tihpuaha vauna an dawng. Airport leh damdawi inte'n vauna an dawn hma hian kar khat liam taah khan sikul 150 chuang chuan bomb tihpuaha vauna hi an lo dawng tawh bawk a ni.

Bomb tihpuaha vauna dawng hi IGI airport-a terminal 3 leh Delhi NCR huam chhunga Burari Hospital, Sanjay Gandhi Memorial Hospital, Guru Teg Bahadur Hospital, Bara Hindu Rao Hospital, Janakpuri Super Speciality Hospital, Deen Dayal Upadhyay, Dabri’s Dada Dev Hospital leh Aruna Asaf Ali Government Hospital te an ni a, Pathianni tlai dar 6 khan email hmangin vauna hi an dawng a ni. Official-te chuan Burari hospital aṭang hian FIR an dawng hmasa ber a, hemi hnu hian hospital dang leh IGI airport aṭangte hian FIR an dawng ve leh niin an tarlang.

Delhi police anti-terror unit-te chuan email hi chhui zuiin, Russia ram aṭanga thawn chhuah angin an chhui chhuak a, mahse, hei hi dark web kaltlanga tih ni ngeia rin a ni thung. Delhi fire service chief, Atul Garg chuan airport leh damdawi in zawng zawngah venhimna tihchhah belhin, venhimna lam uluk zawka kalpui nghal a nih thu a sawi.