PM Modi laka action la tura ngenna High Court-in a hnawl

Delhi High Court chuan Lok Sabha inthlan campaign-naa Model Code of Conduct (MCC) bawhchhiaa puh, prime minister Narendra Modi laka action la tura Election Commission of India (ECI) hnena petition theh luh chu a hnawl.

Petition theh luttu; Shaheen Abdula chuan PM Modi hi hnam leh hnam inkara inhuatna thlen thei zawnga thu sawiah puhin, EC hnenah action la tur hian a phût a ni.

High Court chuan PM Modi laka petition theh luh chu ṭanchhan mumal nei lo leh a bawplawka thu lak a nih thu sawiin a hnawl a ni. High Court hian petition theh luh chungchangah EC-in a duh chuan, dan anga petition chu a hrana a ngaihtuah theih thu a tarlang bawk. Sheheen Abdula hian a petition theh luhah hian inthlan campaign-naa inhuatna tuh thei zawnga an thusawi avangin PM Modi leh BJP hruaitu tute lakah mah action lak a nih loh thu a tarlang bawk.

Delhi High Court hian April 29 khan PM Modi-a laka petition theh luh pakhat a lo hnawl tawh a, he petition-ah hian PM Modi chu sakhuana denchhena vote zawng leh MCC bawhchhiaah puh a ni. High Court chuan tuna petition theh luh pawh hi tun ang hunah chuan a ni lo zawnga thu kaihlekna thil mai a nih thu leh, court chuan petition ngaihtuah turin chhan ṭha tak a hmuh loh avangin a hnawl a ni, tiin a puang.