Chabahar port hman dan turah India leh Iran-in inremna ziak

A kalphung tur an duan hnua kum riat zet a ral hnuah India leh Iran chuan Chabahar port hman dan turah kum 10 chhung atan inremna an ziak. He inremnaah hian Chabahar port-a Shahid-Behesti terminal chu hman tur a ni dawn a, IPGL chuan port thuam ṭhat nan hian USD mtd. 120 a pe bawk ang.

Chabahar port hman dan tura inremna hi India aiawhin Indian Ports Global Ltd. (IPGL) leh Iran aiawhin Port and Maritime Organisation (PMO) te chuan an ziak a ni. IPGL leh PMO te'n inremna an ziahnaah hian India sorkara Ports, Shipping, and Waterways, Minister Sarbananda Sonowal chu telin, Iran-a Minister of Roads and Urban Development, Mehrdad Bazrpash pawh a tel bawk a ni. Sonowal chuan Chabahar port pawimawhna sawiin; sumdawnna atana India-in Afghanistan leh Asia ram dangte a kalpawhna kawng pawimawh a nih thu a tarlang a, Iran nena an insumdawn tawn nana a pawimawh zual thu leh, port a changtlun zelna atan pawh India chuan theihtawp a chhuah chhunzawm tur thu a sawi lang bawk.

Chabahar port siam nan hian India leh Iran chuan kum 2015 khan inremna an siam a, May 23, 2016 khan Prime Minister Narendra Modi-a'n Iran a tlawh laiin Chabahar port chu International Transport and Transit Corridor atana siam turin India, Iran leh Afghanistan te'n inremna an ziak fel a ni. Port hman dan tur chungchangah hian ram pahnihte hian hun rei tak inremna nei thei loin port hi hman mumal theih a ni lawk lo a ni.