LS inthlana vote tla zat tar chhuah har chungchang SC-in ngaihtuah dawn

Supreme Court judge, Justice Sanjiv Khanna chuan Lok Sabha inthlan thawh khatna leh thawh hnihnaa vote tlak dan dinhmun dik tak tarlan tur tihkhawtlai avanga petition theh luh chu May 17-ah ngaihtuah a nih tur thu a sawi.

Association for Democratic Reforms (ADR)-in petition an theh luhah hian court chu Election Commission of India (ECI) hnena vote tlak dan dinhmun dik tak an website-a tarlang tura hriattir turin an ngen a, polling station tina vote tla chhinchhiahna copy scan-te dah teltir turin an phût bawk. Heng bakah hian ADR chuan constituency leh polling station tina vote tla zat leh percentage dik tak te, candidate tinte vote hmuh dan pawh tarlang tel tura an duh thu an ziak a ni.

ADR aiawh hian Prashant Bhushan leh Neha Rathi te an ding a ni. Prashant Bhushan hian Lok Sabha inthlan thawh khatna leh thawh hnihnaa vote tlak dan dinhmun dik tak tarlan kawngah EC an muang lutuk chu tihkhawtlai luih nia a lan thu sawiin, petition chu hmanhmawh taka ngaihtuah a ṭul thu a sawi. Bhushan chuan inthlan thawh khatna, April 19-a neih taka vote tla dinhmun chu ni 11 hnuah tar chhuah chauh niin, inthlan thawh hnihna, April 26-a neiha vote tla dinhmun pawh Aprl 30-ah tlangzarh chauh a ni a ti a, heti chung hian vote thlak zawh hnu lawka vote tla dinhmun an tarlan aiin a let fein a hnua tarlanah hian a pung niin a sawi bawk. Hei vang hian vote tla zat chungchangah hian mipuite'n rinhlelhna an neih phah thu leh, thu rintlak ber hriat a har thu ADR chuan petition-ah hian an tarlang a ni.