Kenya tuilian tuarte tan India-in ṭanpuina a thawn

Africa khawmualpui chhak lama awm, tuilian avanga mi 270 chuang an thih tawhna, Kenya mipuite ṭanpui nan India chuan chhawmdawlna eng emaw zat a thawn luh belh.

India hian HADR (Humanitarian Assistance and Disaster Relief) chhawmdawlna an tih, chhiatna tuartu mipuite mamawh tur chi hrang hrang; damdawi leh ei tur, ton 40-a rit chu a vawi hnihna atan Thawhlehni khan a thawn leh thu external affairs minister, S. Jaishankar chuan a puang. Jaishankar chuan India-in Kenya a ṭanpuina chu hun rei taka ata tawh ram pahnihte inṭhian ṭhatna entirna a nih thu leh, khawvel tana India-in thil ṭha a tihna hmanrua a nih thu a sawi tel bawk. Kenya tuilian tuarte chhawmdawlna tur thawn luh nan hian Indian Air force thlawhtheihna hman a ni.

Kenya-a tuilian avang hian mi 270 chuang an thih tawh bakah sikul 2,000 chuang a chhia a, sikul la dingte pawh khar rih vek a ni. Hei vang hian India chuan kar kal ta, May 10 khan chhawmdawlna hi a lo thawn tawh bawk. Kenya hi tun kar Zirtawpniah hian cyclone Hidaya chuan a nuai leh dawn niin an sawi bawk.