Uttarakhand : Congress-in fiahna paltlang

Supreme Court thupek angin nimin khan Uttarakhand Assembly-ah Congress sorkar chu fiah a ni a, Congress hian fiahna a paltlang a, Congress sorkar a ding leh thei dawn a ni. Official result hi vawiin-ah Supreme Court-in a puang ang.

House-a sorkar fiahnaah hian Congress MLA hel pakua-te chu vote thlak phalsak an ni ve lo a, MLA 61 aṭangin vote lak a ni. Congress hian fiahna paltlang tur hian vote 31 a hmuh a ngai a, hei hi pelin thlawptu 33 a nei a ni.

Sorkar laipuiin March thla khan rorellai, Congress pakua-te chu sorkar lakah hel a, Chief Minister-in budget a pharh pawh a dodal zawnga an vote avangin state sorkar chu ram danpui humhim zo loah puhin President's Rule a lo puan hnan tawh a ni. Mahse Chief Minister aṭanga paih tak, Harish Rawat chu court lamah a zualko a, hemi hnu hian Supreme Court chuan sorkar hi fiah turin a ti ta a ni.

Supreme Court chuan Uttarakhand sorkar chu Thawhlehni chawhma dar 11 leh chawhnu dar 2 inkara fiah turin a ti a, hemi chhung bik atan hian President's Rule puan pawh hlih lailawk a ni. Sorkar fiahna buaipui tur hian observer atan Jaidev Singh a ruat bawk. MLA-ten vote an thlak laite pawh uluk takin video-a lak vek a ni a, heng video leh Jaidev Singh report-te hi vawiin-ah Supreme Court-ah thehluh a ni ang a, court chuan a lo zirchian hnuah result hi a puang ang.

Vote lak a nih hma hian BSP chuan an MLA pahnih chuan Congress party an thlawp tur thu an sawi a ni. MLA helte nena sorkar siam theia inchhal, BJP chuan MLA 28 a nei. BJP MLA Bhim Lal Arya chu an party lakah lungawi loin Congress thlawp zawngin a vote a, hetihlai hian Congress MLA Rekha Ayra chu BJP lamah a ṭang thung nia sawi a ni bawk.

Congress-in hnehna a chan leh tak avangin Uttarakhand-ah hian Harist Rawat-a kaihhruai sorkar a ding leh thei dawn a ni. He state-a President's Rule puan a nih danah BJP kaihhruai NDA sorkar chuan sawisel a hlawh hle a, eptu party-te sorkarna state-a sorkar chu a thuneihna dik lo taka hmanga paihthlaa puh a ni.

Delhi Chief Minister Arvind Kejirwal-a chuan Uttarakhand state-a thil thleng chu sorkar laipui beihna remchangah a hmang nghal a, "Uttarakhand floor test result chu Modi-a kaihhruai sorkar hnawlna a ni. Sorkar laipui hian state sorkar paihthlak mai a chin chu a sim phah ngei ka beisei" tiin a twitter-ah a ziak.