India ka hmangaihna hi min lak bosak thei lo ang : Sonia Gandhi

Congress party president Sonia Gandhi chuan Prime Minister Narendra Modi-an Italian a nih chungchanga a beihna chu chhang letin, "India hi ka in a ni a, he hmunah hian ka hun tawp thlengin ka awm dawn a ni" a ti.

India ram a hmangaihna chu eng mahin a lak bosak thei dawn lo tih sawiin, Sonia Gandhi chuan, "Prime Minister Narendra Modi chuan a duh angin min bei zui thei a, mahse he ram tana kan inpumpekna leh ka hmangaihna chung≠changah chuan min cho let thei lo ang. PM chu min hrethiam turin ka beisei lo a, mahse ram mipuite chuan min hriatthiampui ngei ang tih ka ring a ni" tiin nimina Kerala-a election campaign a neihnaah a sawi.

Italian a nih chungchang PM thusawi chu chhangin, "Ni e, Italy-a piang ka ni. Kum 1968 khan Indira Gandhi mo ni turin India ramah ka rawn kal a ni" tiin, India rama kum 48 a awm chhungin RSS, BJP leh party dangte chuan Italy-a piang leh seilian a nih chungchangah tihzah tumin an bei fo tih a sawi. "Nu leh pa fel leh dik tak laka piang ka ni a, ka zahpui lo. Italy-ah chhung leh khat pawh ka nei a ni. Mahse India ram hi ka hmangaih a, ka hmangaih ber thisen pawh he hmunah a chhuak a, he hmunah ngei hian ka thawk tawp thlengin ka awm ang, ka vapte pawh he hmunah hian a awm ang" a ti.

Sonia Gandhi chuan Modi-a kaihhruai sorkar chu sakhaw zalenna leh democracy lungphum tihchhiat tumah a puh a, mi rethei leh hnuaihnung zawkte ngaihthahah a puh bawk. PM chuan ram pawn lama zinchhuak a, ram hruaitu dangte kawm tura hun tam tak a neih theih laiin, ram chhunga harsatna tawk mek loneitu leh mi retheite tan hun a nei thei lo a ni, tiin a sawi.