UK-in Vijya Mallya thawn kir tura ngenna hnawl

United Kingdom (UK) chuan sorkar laipuiin bank hrang hranga leiba tam tham tak nei mek, Vijya Mallya India-a thawn kir tura a ngenna chu a hnawlsak.

Vijya Mallya hian bank hrang hrangah loan lakna leiba cheng vaibelchhe 9000 chuang zet a nei mek. Bank-te hi Supreme Court-a an zualko hnuah, Mallya hi London-ah a kal a, court-a inlan tura koh ni ṭhin mah se, tun thlengin India rama a la rawn kir duh lo a ni. Hemi hnu hian a passport pawh cancel sak a ni bakah, bail theih loha manna tur thupek pawh tihchhuah a ni tawh bawk.

UK chuan passport nung lo tih vang ringawtin Mallya chu India ramah a thawn kir thei lo tih a sawi a, dan ang taka thawn let a nih theihna tura ngenna siam zawk turin a hrilh.

Ministry of External Affairs official thupuangtu, Vikas Swarup chuan, "UK sorkar hian 1971 Immigration Act hnuaiah, UK rama awm tur chuan an luh laia an passport a nung a nih chuan an awm chhunzawmna turah valid passport an neih kher a ngai lo tih min hrilh a ni" a ti.

Mallya hian kar hmasa khan Rajya Sabha member a nihna aṭangin banna a lo thehlut tawh bawk. The Sunday Guardian-in a kawmnaah, India rama kir chu a duh tih a sawi a, mahse a chungthu dik taka relsak a ni dawn em tih a la chian theih loh avangin a tana kir a la hun rih lo nia a hriat thu a sawi.