Uttarakhand-ah Congress sorkar a ding leh dawn

Uttarakhand Assembly-ah Congress chuan fiahna a paltlang tak avangin Congress sorkar a ding leh dawn a, Harish Rawat-a chu chief minister a ni leh dawn ta.

Congress-in fiahna a paltlang tak avang hian sorkar laipui chuan March thla aṭanga President's Rule puan chu hlih a ni dawn tih a hriattir tawh bawk.

Fiahna an paltlang hnua chanchin thar lakhawmtute a kawmnaah, Rawat-a chuan thil hluite chu dah ṭhain bul thar an ṭan dawn tih a sawi. Congress president Sonia Gandhi chuan Uttarakhand-ah fiahna an paltlang chu democracy-in hnehna a chang ta tih entirna a ni, a ti. Rahul Gandhi pawhin PM Modi chuan he thil thleng hi inzirna atana hman a duh thu sawiin, ram mipuite chuan democracy palzut tumna chu a ngaizam mai mai dawn lo a ni, a ti.

Delhi Chief Minister Arvind Kejriwal-a chuan sorkar laipui chu Uttarakhand state chunga a chet dan chungchangah ngaihdam dil turin a phut a, BJP kaihhruai NDA sorkar chet dan chu a democracy kalphung lo hle niin a sawi.