Bangladesh-ah Islamist hotu khaihlum

Bangladesh-a Jamaat-e-Islami party hotu Motiur Rahman Nizami chu nimin zing khan khaihlum a ni.

Kum 73 mi, Nizami hi Dhaka-a International Crimes Tribunal court chuan thi turin a chungthu a lo relsak tawh a, tunhnaia Jamaat-e-Islami hruaitu khaihlum pali-na a ni.

Nizami hi Bangladesh-in Pakistan laka independence a sual lai, kum 1971 indona thlen laia a mihringpuite laka pawikhawihna nasa tak thlenah puh a ni. Mi tam tak tihlum, pawngsual leh nghaisaah puhin thiam loh chantir a ni. Indo lai hian helpawl din a, Bangladesh indepedence thlawptute chu Pakistan sipaite hnena hrilh a, tihhlum tirah puh a ni bawk.

Kar hmasa khan Nizami-an
thiam loh chantir a nihna chung≠chang ngaihtuah nawn tura a ngenna chu hnawlsak a ni a, hemi hnu hian President Abdul Hamid hnenah zahngaihna lantir tura dilna a thehluh duh loh avangin khaihlum a ni ta a ni.

Dhaka-a khaihlum a nih dawn hian a tanna jail pawn lamah mi tam tak an pungkhawm a, pawikhawihtu tihhlum a ni tur chu an lawm a ni. Pungkhawm zinga ṭhenkhat chuan Nizami lemte kengin, an lo sawisa a ni.

Hetihlai hian Jamaat-e-Islami party chuan Nizami lakah dik taka rorel sak a ni lo tih an sawi a, politics lama phuba lakna atana hman a ni, an ti. Vawiin hian lungawi lohna lantirin rampumah nawrh huaihawt an tum. Khaihlum a nih hma hian a chhungte hmuh tir a ni a, a ruang hi Bangladesh hmarlama an khuaah phum a ni.

Bangladesh hi kum 1971, December 16 khan independent ram a ni a, independence an sual laia indonaa thi zat chiah hi hriatchian a ni lo a, Bang≠ladesh sorkar chuan mi maktaduai thum vel niin a sawi. Mahse independent researcher-te erawh chaun thi zat hi nuai nga niin an sawi thung.