Congress-in an party sorkarna state-te farm law hran siam turin ti

Congress party chuan sorkar laipuiin farm law thar pathum a siam chu dodal chhunzawm zelin, an party sorkarna state-ah anmahni siam farm law pass mai turin a hriattir.

Congress sorkarna state zawng zawngah chuan special assembly session nei a, an mahni state siam farm bill chu pass turin Congress party chuan an party mi leh sa te chu a hriattir a ni. Hemi atan hian Congress leader Abhishek Singhvi chuan law thar tur a draft chhin tawh bawk.

Farm law thar khing tur hian Supreme Court-ah kal a ṭum mai rih loh thu Congress chuan a tarlang. Court-ah an kal mai chuan state assembly-a farm bill pass turte chu a nghawng theih thu an sawi a, hei vang hian mahni state-a session-ah farm law tur siam a, pass ve mai turin a hriattir ta a ni.  Hemi rual hian a ṭul hunah chuan court-ah pawh an kal tur thu an sawi bawk.   

Congress hruaitu Rahul Gandhi leh midangte chuan farm law duhlohna lantirin Punjab leh Haryana-ah tractor rally an buatsaih mek a, he farm law thar hi Parliament-a Rajya Sabha-a eptu MP paruk suspend laia pass a nih avangin Congress party member te hi an lungawi lo zual bawk a ni.

Rahul Gandhi chuan thla ruk liam ta chhunga sorkar laipuiin policy a siam te chu miretheite tana ṭhatna leh ṭangkaina nei lo vek an nih thu a sawi. "Covid-19 hri len laiin farm law pathum an pass a ni a, an pass-na chhan chu loneimite chuan engmah an hre thiam dawn lo nia an ngaih vang a ni. Mahse loneitute thil tih theihna chu an hre lo a ni," tiin Punjab-a Sangrur hmuna Kheti Bachao Rally a neihnaah Rahul chuan a sawi.