88th Indian Air Force Day hman a ni

Nimin kha Indian Air Force Day vawi 88-na a ni a, hemi pual hian grand parade-cum-investiture ceremony chu Uttar Pradesh, Ghaziabad-a Hindon airbase-ah hman a ni a, he hunah hian Chief of Defence Staff (CDS) General Bipin Rawat pawh a tel.

CDS bakah hian Chief of Army Staff (CAS) General Manoj Mukund Naravane leh Chief of the Naval Staff (CNS) Admiral Karambir Singh an tel bawk. Parade hmuhnawm tak leh van sanga India indo thlawhtheihna hrang hrangte che vel hmuh tur a awm bawk a ni.

President Ram Nath Kovind, prime minister Narendra Modi leh union defence minister Rajnath Singh-te chuan IAF chu lawmpuina hlanin, India ram boruak venghimtu leh chhiatna a thlen changa midangte chhanhimtu an nih thu an sawi. 

Indian Air Force (IAF) hi kum 1932, October 8, British awpna hnuaia India a awm lai a din a ni. King George VI khan Indopui pahnihna an thawh ṭhat avangin an hming bulah 'Royal' tih a pe a, mahse hei hi India independent hnu, kum 1950 khan paih a ni.

Indian Air Force (IAF) chief Air Chief Marshal Rakesh Kumar Singh Bhadauria chuan IAF chu India ram humhim tura an inpeih reng thu a sawi.

"Kan ram hian lo hria se ka duh chu Indian Air Force-te chu kan sovereignty leh a kaldan phungte humhim tur chuan eng kawngah pawh kan inpeih reng a ni.

"Kum 89-na kan luh ṭan mekah hian, IAF chuan inthlak danglamna a nei. Tunah hian hunbi thar aerospace power hriatfiah tharna hun leh multi-domain operation tihpumkhatna kawng lam kan pan mek a ni," a ti.