India-in firfiak dona ngai pawimawh zual turin UN ngen

India chuan United Nations hnenah ngenna thlenin khawvel puma remna leh muanna awmna atan te leh  firfiak dona kawnga nasa zawka hma la turin a ti.

''Measures to Eliminate International Terrorism'' tih chungchanga United Nations General Assembly (UNGA) 75th session-a Sixth Committee hmaa thu a sawinaah India aiawh, India's Permanent Mission to the UN-a First Secretary/ Legal adviser Yedla Umasankar chuan UN chu firfiakna a dona kawngah Financial Action Task Force (FATF) agency ang chite chu thawhpui turin a ti a ni. 

Yedla Umasankar chuan FATF chu money laundering leh firfiakte sum hmanga thlawpna dodaltu leh chutiang thil a thlen lohna tura hma latu a nih thu sawiin, UN pawh chuan thawhpui se a duh thu a sawi. Khawvel puma muanna leh venhimna ṭha a awm theihna turin UN chu a intihchak thar leh a ngai niin a sawi bawk.

First Secretary chuan firfiakna dona kawngah chuan firfiak pawlte leh an zawm­puite tihchhiat ringawt chu a do dan tur a ni lo tih sawiin, ram ṭhenkhat firfiakna thlawpa sum hmanga lo thlawp ṭhinte lakah pawh khauh taka hma lak a ngai a ni, a ti.