EC-in star campaigner neih theih zat titlem
Election Commission of India chuan kumina assembly inthlan leh by-election neih tur atana recognised national party leh state party-ten 'star campaigner' an neih theih zat chu 40 aṭangin 30-ah a titlem.
Ram chhunga hripui leng mek vangin inthlan neih tur atana campaign-naa mipui tam tak pungkhawm tur venna kawng khat atan ECI chuan star campaigner zat hi a titlem a ni.
Recognised national leh state party-te bakah, unrecognised registered political party-ten star campaigner an neih theih zat pawh 20 aṭangin 15-ah tihtlem a ni bawk.
Commission chuan party hrang hrangten star campaigner list an thehluh theih hun, inthlan neih hun tur puan aṭang ni 7 chhung tih chu ni 10-ah a pawhsei sak bawk a ni. EC-in star campaigner neih theih zat a tihtlem tak avangin political party hrang hrang pawh list thehlut ṭha turin tih an ni.
India ramah hian recognised national party pariat an awm mek a, chungte chu - BJP, Congress, BSP, NCP, Trinamool Congress, CPI, CPIM leh NPP-te an ni.
Bihar assembly inthlan thawh thuma neih tur chu October 28, November 3 leh November 7-ah neih a ni dawn a, state hrang hranga by-election neih ngaihnaah November 3 leh November 7 hian vote thlak a ni bawk ang.