Kerala CM-in thupha chawi turin PM phut

Kerala Chief Minister Oommen Chandy chuan Prime Minister Narendra Modi chuan an state leh Somalia ram a khaikhin avangin thupha chawi turin an phut tih nimin khan a sawi.

Chandy hian a Facebook-ah hemi chungchang hi ziak langin, Malayalee-te chu PM thusawiah hian an lawmlo hle a ni, a ti. State mipuite chuan BJP rally-a a thusawi danah PM chuan ngaihdam a dil an phut a, tuna a dil lo a nih pawhin an la phut chhunzawm zel dawn a ni, a ti.

PM Modi hian BJP in election rally a huaihawta thu a sawiah, Kerala state-a Scheduled Tribes zinga nausen thihna thleng zat chu a ratio a sang hle tih sawiin, Somalia ram ai pawhin an dinhmun chu a hlauhawm zawk a ni tiin a sawi. Modi chuan media report aṭangin Peravoor-ah tribal naupangten bawlhhlawh paihna hmunah ei turte an zawng ṭhin tih a lo hriat thu sawiin, state sorkar chu rorelna ṭha loah a puh.

CM Chandy chuan PM Modi-an Kerala leh Somalia ram a tehkhin chu thil awm lo tak a ni tiin, state mipuite chuan a thusawi hi a sut leh an ring a, mahse sutna thu leh ngaidam dilna a chhakchhuak zui lo a ni, a ti. Chandy hian Modi hi lehkha pawh thawnin, Kerala state chungchangah thu belhchian dawllo tak sawichhuak a, Prime Minister Office zahawmna tichhe lo turin a ngen.