Khaw kheng thleng mek ngaihsak tawk loah sorkar puh

Ramchhung hmun hrang hranga khaw kheng vanga harsatna tak thleng mekah sorkar laipui leh state sorkar-te chu harsatna chinfel kawnga che
ṭha tawk loah Supreme Court a puh a, sorkar laipui chu chhiatna nasa tak thleng meka a kut silah a puh.

Khawkheng tuar mek, Gujarat, Bihar leh Haryana state-te chuan khaw kheng thlenna hmun tia an inpuan duh loh avangin mi tam takin riltamin an awm a, mahni intihhlum leh hmun ṭha zawk beiseia a huhoa pem chhuahna nasa tak a thlen phah a ni, a ti.

Justice Madan B. Lokur leh NV Ramana awmna bench chuan khaw kheng thleng mek chungchang avanga petition thehluh a ngaihtuahnaa he thu hi a sawi a ni.

Court-ah petition theh≠luhah hian state 12 - Uttar Pradesh, Karnataka, Madhya Pradesh, Andhra Pradesh, Telangana, Maharashtra, Gujarat, Odisha, Jharkhand, Bihar, Haryana leh Chattisgarh-te chuan khawkheng an tuar mek a,mahse thuneitute chuan harsatna tawkte chhawmdawlna a pe ṭha tawk lo niin a tarlang. Court chuan ramchhung khaw kheng thlenna district hrang hranga mi chen chu vaibelchhe 33 vel an ni tih a sawi bawk.

Supreme Court chuan mipui tam tak harsatna thlen mekte chu ngaihthah chi em ni tiin sorkar laipui a zawt a, sorkar laipui chu state sorkar lakah mawhphurhna bel a, sum lam chauhah puiah a puh bawk.

State pathum, Bhar, Gujarat leh Haryana-ten khaw kheng an tuar mek tih an puang duh lo chu Supreme Court chuan a sawisel bawk a, mi retheite chanvo laksakah a puh.