Delhi inthlanah AAP hneh takin tling

Delhi Legislative Assembly inthlan result chu nimin khan puan a ni a, rorellai Aam Aadm Party (AAP) chu hnenah taka thlan tlin leh niin, a term thumna atan sorkarna a siam leh dawn. 

Seat 70 awmna, Delhi Legislative Assembly-ah hian general seat 58 leh reserved seat 12 a awm. February 8 khan vote thlak a ni a, vote nei mi vaibelchhe 1.47 awmin, vote tla hi 62.59% a ni. Candidate 672 an awm a, vote thlakna polling station 2,700 siam a ni. 

Kum 2015 assembly inthlanah khan vote 67.5% a tla a, AAP chuan seat 70 awmah seat 67 lain, BJP-in seat thum an la a, kum 15 zet rorelna lo chang tawh Congress party chu a artelukawn thung. 

Nimin zing dar 8 aṭangin vote tlate hi chhiar a ni a, vote chhiarna centre 21 siam a ni.

AAP hian seat 70 awmah seat 62 a la a, sorkarna siam tura seat neih ngai zat 36 chu a pel chiang hle a ni. Mahse inthlan hmasa a pha lo thung a, kum 2015 inthlan aiin seat 5 in a la tlem a ni. AAP sorkar paihthla a, sorkar thar siam tum BJP chuan an beisei a pha lo hle. Seat 8 chauh a la pha a, mahse inthlan hmasa ai chuan seat 5 in a la tam thung. Congress party chu an artelukawn leh a, an party candidate 66 zinga 63 in sum dahkham an chawi a ni. . 

AAP hian vote tla aṭangin 53.6% a hmu pha a, BJP-in 38.5% hmuin Congress-in 4.2% a hmu a ni. NOTA-ah 0.6% a tla bawk. 

Aam Aadmi Party (AAP):

Delhi-a rorel tura hneh taka thlan tlin nawn leh, Aam Aadmi Party  (Common Man's Party ) hi kum 2012, November 26-a Arvind Kejriwal-a'n a din a ni.

Kum 2011 khan activist pahnih, Kerjiwal leh Anna Hazare-te chuan Jan Lokpal Bill phutin India Against Corruption movement an kalpui a, mahse an kal zel dan turah an ngaihdan a in ang thei ta lo a ni.  Kejriwal-a'n politics lam hawia kalpui a duh laiin Hazare hian politics nena inkaihhnawih duh loin an inṭhen a, Kejriwal hian political party thar hi a din ta a ni. 

Kum 2013 Delhi  inthlanah khan AAP hian a ṭum  khatna atan chuh vein, seat 70 awmah seat 28 lain, party zinga seat la hnem ber dawttu a ni pha a ni. Party mala sorkar siam thei an awm loh avangin AAP hian Indian National Congress (INC) thlawpnain sorkar a siam a, mahse an thawhdun chhunzawm theih loh avangin ni 49 chauh sorkarna an chelh hman. 

Kum 2015 inthlanah khan AAP hian nasa taka hma sawnin, seat 70 awmah seat 67 zet lain party malin sorkar a siam thei ta a ni.  BJP chuan seat thum la vein, Congress erawh seat khat mah la loin a artelukawn thung. 

AAP hian Delhi bakah kum 2017  khan Goa assembly leh Punjab assembly inthlanah a chuh bawk. Goa-ah chuan seat an la lo a, Punjab-ah chuan Lok Insaaf Party nen thawk dunin, AAP bik hian seat 20 a la a ni. 

Delhi chief minister pasarihna Arvind Kejriwal  hi August 16, 1968 khan  Siwani, Bhiwani district, Haryana-ah a piang. 

Hisar-a Campus School leh Sonipat-a Christian missionary Holy Child School-ahte lehkha a zir ṭhin. Kum 1985 khan  IIT-JEE exam-a All India Rank (AIR)-ah 563 a ni a, Indian Institute of Technology, Kharagpur aṭangin Mechanical engineering a zo. 

1989 khan Tata Steel zawmin Jamsehdpur-ah dah a ni a, Kum 1992 khan  Civil Services Examination tura inbuatsaih a duh avangin a hna hi a bansan a ni.  Hetihlai hian Calcutta (tuna Kolkata) ni taah hian kalin Mother Teresa-te pawh a hmu nghe nghe. Missionaries of Charity-ah volunteer-in a thawk reng tawh a, hmarchhaka  Ramakrishna Mission leh  Nehru Yuva Kendra-ahte pawh volunteer-in a thawk ṭhin bawk.

Kum 1995 khan  Indian Revenue Service (IRS)-ah a inziak tling a, February 2006 khan a hna hi bansan mah se India sorkar chuan a pawm sak lawk lo a, 2011 khan cheng nuai kua zet a chawi hnuah a hna aṭanga a banna hi sorkar laipui chuan a pawmsak chauh a ni.

Kum 2012 khan Aam Aadmi Party dinin, tunah hian national convener a ni mek. 

Kum 2006 khan eirukna umbo a nih theihna tura a hnathawh avangin Ramon Magsaysay Award pawh a lo dawng tawh bawk.

Central-a rorellai, BJP chuan Delhi inthlanah hian hnehna chan ngei tumin a bei nasa a, union minister zawng zawngte bakah state hrang hranga an party hruaitute pawh Delhi-ah hian an campaign a ni. Mahse an beisei an pha lo hle. Tun ṭum hi a zawna state panga inthlana BJP an chak zawh lohna a ni.