Sorkar laipuiin Skype ID 1,000 chuang a block

Microsoft nena thawk dun, Indian Cyber Crime Coordination Centre (I4C) te chuan India rama blackmail, tihluihna hmanga pawisa laksak leh police leh thuneitute anga inlantir a, internet kaltlanga mi manna atana hman Skype ID 1,000 chuang an block.

Skype ID 1,000 chuang an block thu hi union home ministry chuan tarlangin, internet kaltlanga pawikhawihtu; cybercriminal, ram pawn lam aṭanga chete hmalakna a nih thu an sawi. Home Ministry chuan hetianga internet kaltlanga inbumna, blackmail, tihluihnaa pawisa laksak leh thil dang avang hian National Cyber Crime Reporting Portal (NCRP) chuan complaint tam tak an dawn thu tarlangin, police bakah Central Bureau of Investigation (CBI), Narcotics Department, Reserve Bank of India (RBI), Enforcement Directorate (ED) leh thuneitu dangte anga an inpho chhuah ṭhin thu I4C chuan an sawi tel bawk.

I4C hian ram chhunga cyber crime kaihhnawih thil chi hrang hrang an vil a, hetiang thubuai chhui zuina kawngah state-te an pui ṭhin bawk. Skype ID 1,000 chuang an block bakah hian SIM card block leh mobile tihtawp te, mi bum ṭhinte khawl hmanraw chi hrang hrang pawh an block ṭhin bawk. Internet kaltlanga hetiang harsatna tawkte chuan helpline number 1930 emaw, www.cybercrime.gov.in be pawp ṭhin turin mipuite an ngen.