Pakistan flag hman vangin TV anchor lakah FIR theh lut

Karnataka-a Kannada news channel anchor, Ajith Hanumakkanavar chu India rama mihring pung chak chungchanga debate neih laia Muslim-te enhranna nia ngaih theih tura Pakistan flag nena a sawi zawm avangin a lakah FIR theh luh a ni.

Ajith Hanumakkanavar lakah hian Tanveer Ahmed chuan FIR theh lutin, police-te chuan Indian Penal Code (IPC), 502 (mi chi hrang inkara inhuatna tuh leh tum ṭha lo nei) hmangin an man nghal. Tanveer chuan TV-a Ajith thusawi duh dan chu India ram tana Muslim-te tha thawh ve sawi nep tumna a nih thu tarlangin, Pakistan flag nena a sawi zawm chu a tihluih ngei a ni, a ti. "He anchor-in thu a sawiah hian inen hranna a tel a, inhuatna tuh tumin, Muslim-te dinhmun dah hniamin, Hindu nen min inhuattir a tum a ni," a ti. Ajith Hanumakkanavar thusawi avang hian social media lamah inhnialna a chhuak nasa nghal hle a, Suvarna news channel chuan he debate video hi an la thla nghal a ni.