MHA-in LTTE helpawl khapna a pawtsei

Ministry of Home Affairs (MHA) chuan Liberation Tigers of Tamil Eelam (LTTE) helpawl khapna a lekkawh mek chu kum nga dang atan pawhsei a nih thu a puang. MHA hian LTTE hi Unlawful Activities (Prevention) Act (UAPA) hnuaia dan phal loha din leh firfiaka chetna pawlah puangin khapna a siam a ni.

May 14, 2019 khan LTTE khapna hi puan tawh a ni a, UAPA hnuaia tribunal chuan November 21, 2019 khan a pawmpui tawh. MHA chuan khapna an siam chung leh, India sipaite'n an pawl an tuk zal tawh hnuah pawh LTTE ngaihdan kalfawrpui zualte chuan pawl thil tumte chhawm nungin tun hnaiah an che chhuak leh ṭan niin a sawi a, "LTTE hruaitute leh thlawptute chuan India sorkar dodalin, mipuite rilru hruai kawi an tum a, a bikin Tamil mipuite rilruah sorkar laipui dodalna tuh an tum a ni. Hei vang hian sorkar chuan LTTE tho chhuak leh tur dan nan khapna siam hi ṭul a ti a ni," tiin an puang.

LTTE hi Sri Lanka-a innghat niin, India, a bikin Tamil Nadu-a huang zauh tuma hma la reng an ni a, MHA chuan India aṭanga inlak hran duh pawl niin, he ngaihdan hi Tamil mipuite rilruah tuh an tum a ni, a ti. Kum 2019 aṭanga khap an nih hnuah LTTE leh a thlawptute hi pawikhawihna chi hrang hrang bakah ralthuam leh ruihhlo tawlhruk thlengin an inhnamhnawih chhunzawm reng a ni.