Vawiin-ah Kerala, TN leh Puducherry inthlang dawn

Kerala, Tamil Nadu leh Pud-cherry assembly inthlan chu vawiin hian neih ani dawn a, vote tla-te hi May 19 ah chhiarin result puan nghal a ni ang.

Assembly seat 140 awmna Kerala-ah hian vote nei mi vaibelchhe 2.61 an awm. Candidate 1,203 awmin an zingah hian hmeichhia 109 an tel a ni.

Tamil Nadu-a assembly seat 234 awmah candidate 3,776 an awm a, vote nei mi vaibelchhe 5.79 an awm. Candidate zingah hian chief ministerial candidate pali - AIADMK hotu J Jayalalithaa, DMK hruaitu M Karunanidhi, DMDK Vijayakant leh PMK aṭangin Anbumani Rama-doss-te an awm.

Puducherry-ah chuan vote nei mi nuai 9.43-ten candidate 300 chuang aṭangin an aiawh tur mi 30 an thlangchhuak dawn a ni.

Tamil Nadu inthlan neih turah hian political party-ten an mani-festo-ah a thlawna thil sem tur an tiam nasa hle. Election Commi-ssion of India chuan AIADMK hotu Jayalalithaa-i leh DMK hruaitu Karunanidhi-te hnenah poll guideline palzuta puhin hriattirna a pe a ni. Hriattirna hi party secretary pahnihte thawnin, an party chuan inthlan thianghlimna an tichhia niin a sawi.

Tamil Nadu-a Aravkurichi biala vote thlak hun tur chu May 23-ah sawn a ni. Official-ten he bialah hian party hrang hrangte dan kalha chein, voter-te thamna sum an pe tih an hriatchhuah hnuah inthan hun tur hi sawn a ni. March thlaa inthlan neih tur puan a nih aṭang khan Tamil Nadu-ah hian vote leina atan hman tum, pawisa fai cheng vaibelchhe 100 chuang an man tawh.

Electoral official-te chuan Tirupur district-ah truck pathum aṭangin pawisa fai, cheng vaibelchhe 570 an man bawk. Mahse a hnuah State Bank of India chuan he pawisa man hi bank pawisa a nih thu leh, Reserve Bank of India phalna neia an phurchhuah a nih thu a sawi. Official-te chaun motor number leh an document-a number inziah chu a inmil loh avangin ringhlelin an lo man niin an sawi.