NGO hnen aṭanga thamna laa puh MHA officer man

Ministry of Home Affairs (MHA)-a Under Secertary Anand Joshi chu NGO hnen aṭanga thamna sum la leh, official file-te tihchhiaa puh a nih avangin Pathianni khan Central Bureau of Investigation (CBI) in a man.

Anand Joshi hi West Delhi-a Tilak Nagar area aṭangin thu zawhfiah turin CBI headquarters-ah hruai a ni a, a hnuah man zui nghal a ni.

CBI thupuangtu Devpreet Singh chuan, "Tlai dar 5 velah man a ni. CBI headquarters-ah hian an puhna hrang hrang chung≠changah thu zawhfiah a ni" a ti.

Joshi hi MHA-in Foreign Contribution Regulation Act (FCRA) palzuta puha NGO Sabrang Trust henna hriattirna pekna leh, Trust licence cancel a nih chungchang tarlanna file-te tichhiaah puh a ni.

May 11 khan Joshi hi Indiapuram-a an chenna in aṭangin a kal bo a, a nupui tan lehkha hnutchhiahin an fate chu ṭha taka lo enkawl tur leh, an tawhnaa an senior pakhat Additional Secretary BK Prasad chuan thla eng emaw zat kalta aṭang khan a tinawmnah thei hle niin a sawi. A lehkhaah chuan rilru lam thlenga a tihnat thu sawiin, thil awm dan chu a ṭhat loh zel avangin a kalbo mai a ngaih thu a sawi a ni. Joshi-a nupui, Meenakhsi chuan a pasal hian thamna a lak duh loh avangin an hotu hian dik lo takin a puh zawk niin a tarlang.

CBI chuan Indian Penal Code leh Prevention of Corruption hnuaiah Joshi lakah hian thubuai an ziak tawh a, a chenna in bakah a office-te pawh an dap tawh a ni. CBI chuan an dapna aṭang hian pawisa fai cheng nuai 7.5 bakah MHA leh Ministry of I&B kaihhnawih thil document pawimawhte an man tel tih an sawi. Joshi chuan an puhna te chu thu dik lo niin a sawi thung a, NGO te phalna petu chu a senior-te niin a sawi.

NGO pahnih, Setalad enkawlten FCRA an palzut chung≠chang tarlanna file, Home Ministry aṭangin a bo tih hriatchhuah a nih aṭangin he thil hi buaipui
ṭan a ni. File-te hmu lehin FCRA division-ah dah let a ni tawh a, mahse hemi chungchang hi chhuichiang turin CBI hi ngen a ni.

Home Ministry-in FRCA palzuttu, Setalvad NGO pakhat, Sabrang Trust registration tihtawp sak a tum laiin he file hi a bo tih hriatchhuah a ni. Sabang Trust licence hi kum 2015, September 9 khan FCRA rules hrang hrang a palzut avangin suspend a lo ni tawh a ni. NGO hian fund an dawnte hi dik lo takin mimal hlawknate an hmang nia puh an ni.

File bo tih hriatchhuah a nih hnu hian ministry official-te chuan chhuiin, Joshi chu file labotu a ni tih an hrechhuak a ni. Hemi hnu hian thu zawhfiah tura koin, file pawh hi an hmu let a ni.

Under Secretary-te hian file an lachhuak thei lo a, Joint Secretary leh a chung lam rank chin chauhin file hi an hawn thei a ni. Hei vang hian Joshi-a thiltih hi dan bawhchhiatna lian tak a nih thu CBI official chuan a sawi.