ED-in Vijay Mallya hruai kir dan buaipui

Enforcement Directorate (ED) chuan leiba, cheng vaibelchhe 9,000 chuang nei mek, Vijay Mallya chu UK aṭanga India rama hruai kir a nih dan tur a buaipui mek.

ED hian Ministry of External Affairs-ah a hriattir tawh a, hei bakah hian Prevention of Money Laundering Court aṭangin clearance a dil bawk. Mahse heng thilte hi tifel tur chuan thla khat chuang zet hun a duh rin a ni.

Vijay Mallya hi a leibatna, bank hrang hrangte Supreme Court-a an zualko hnuah March thla tir khan UK-ah hian a kal a, a thubuai neihte hma≠chhawn turin ṭum eng emaw zat koh ni mah se tun thlengin a la rawn kir duh lo a ni. Hemi hnu hian a passport pawh cancel sak a ni a, UK sorkar hnenah India rama thawn turin ngen a ni.

Mahse UK sorkar chuan document dik thlap nen Vijay Mallya hi an rama lut a nih thu sawiin a thawn haw theih loh thu a sawi. Hei vang hian sorkar chuan kawng hrang hrangin Mallya hruai kir a nih theih dan hi a buaipui mek a ni.

Kar hmasa khan ED leh Central Bureau of Investigation (CBI) chuan Interpol hnenah Mallya lakah red corner notice tichhuak turin an lo ngen tawh a ni. Prevention of Money Laundering Act Court pawhin non-bailable warrant a tichhuak bawk.