US president alo zin dawn

US president nilai Donald Trump leh a nupui first lady Melania Trump chu February 24 leh 25 cham turin India-ah, a vawikhatna atan an lo zin dawn thu White House chuan a tarlang.

India an cham chung hian prime minister Nerendra Modi home state Gujarat-a Ahmedabad an tlawh dawn bakah, New Delhi an tlawh bawk ang. Ram pahnihte thawhdunna tih ngheh a nih zel theih nana rawn zin tur a nih thu Ministry of External Affairs (MEA) chuan a tarlang a ni.

Nikum khan Republic Day-a chief guest ni turin India chuan Trump hi a lo sawm tawh a, mahse a hun ruahman lawksa nen a insut buai avangin a rawn kal thei ta lo a ni. Nikum September thlaa PM Modi US-a a zin ṭum khan Modi hian Trump hi India-ah a chhungte nen zin turin a lo sawm tawh bawk.

Tunhnai lawka US-a Ambassador ruat thar Taranjit Singh Sandhu chuan India-a zin tura sawmna (official invitation) chu Trump hnenah a pe a ni. Kar liam ta khan Modi leh Trump hi phone hmanga an inbiak thu leh he inbiaknaah hian Trump chuan India zin a remtih thu MEA chuan a tarlang.  

US security-te chuan India ram an rawn thli tlai ṭan a, security a ṭha tawk em tih leh venhimna lama an thawh ho dan turte thuneitute chuan an inhriattir tawn a ni.