UN-in India economy ṭhanna tura beisei zat tisang

United Nations (UN) chuan kum 2024 chhunga India economy ṭhanna tura beisei zat 6.2% anga a chhuah tawh chu ennawnin, 6.9%-a ṭhang thei tura beisei a nih zawk thu a sawi.

UN hnuaia World Economic Situation and Prospects report 2024 chuan kum laihawl aṭanga thlirna dinhmun a tihchhuahah India economy ṭhan theihna tura a beisei zat hi tisangin, hei hi mipuiin investment an tih nasat vang leh, mimal anga thil lei dan phung a ngheh leh ṭhat vang niin a tarlang. India economy chu kum 2024-ah 6.9%-a ṭhang tura beisei a nih thu leh, 2025-ah chuan 6.6%-a ṭhang tura beisei a nih thu a tarlang bawk a ni.

Thil leitute tana leina man sang chak lutuk pawh a ziaawm tawh tura beisei a ni a, 2023-a 5.6% a nih laiin, 2024-ah chuan 4.5% chauhin thil man san chak zawng hi a kal tawh dawn a, hei hi 2025-ah chuan 4% ni tura beisei a ni thung.

World Economic Situation and Prospects report 2024 kum laihawla ennawn tihchhuah takah hian khawvel pum huap economy hi ṭhan belh hlek tura beisei a ni a, hnathawh tur indaih lohna tipung si loa thil man tihhniam theih tura ngaih a ni. UN chuan report aṭang hian thil ṭha lam hmuh tur tam mah se, khawvel pum economy chu Middle east leh tuipui sen vela harsatna awm leh innghirnghona avanga danglam thei leh chhe rup thei tho a nih thu an tarlang tel bawk.