Nepal-in Everest leh MDH bawlhlo siamte an rama lak luh khap
Nepal-a Department of Food Technology and Quality Control chuan India rama bawlhlo siamtu lian leh lar, Everest leh MDH-te siam masala chi hrang hrang an rama lak luh, ei leh hralh chhuah khap a nih thu a puang.
Department thupuangtu, Mohan Krishna Maharjan chuan,"Hong Kong leh Singapore pawhin an khap tawh a, keini pawhin ethylene oxide bakah chemical dang tam dante zir chianna neih kan duh a ni. Heng masala-te dinhmun kimchang hriat a nih hma chuan khapna hi kalpui tur a ni, " a ti. Nepal hian Everest leh MDH siam masala-te an rama khapna a siam chhanah hian heng masala-a cancer thlen theitu langsar tak; ethylene oxide a tam vang nia sawi chu zir chian phawt an duh thu an sawi. Zir chianna neih chhung chu Nepal sorkar hian heng masala-te hi mipuiin zuar emaw, lo ei emaw, an rama la lut lo turin a hriattir a ni.
Nepal-in khapna an siam hma hian Hong Kong-a Centre for Food Safety of the Government chuan ethylene oxide awma hriat a nih avangin MDH leh Everest siam masala chi li chu an rama lak luh an lo khap tawh a, Singapore pawhin an khap tawh bawk.
Hetih lai hian Spice Board of India chuan heng lai biala masala thawn chhuahte an him thu-ah leh mihring tana him an ni em tih thu-ah uluk taka an vil thu sawiin, Techno-Scientific Committee rawtna anga a siamna hmun endik te, sorkar lab pawmpui ngeia test tura sample lak khawm te an tih ṭhin thu an tarlang.