PMLA dan hmanga ED-in a man theih chin SC-in bitliah a siam

Supreme Court of India chuan mimalin zalenna a neih ṭanchhanin, special court-in Prevention of Money Laundering Act (PMLA) dan hmanga inlan tura a kohte chu hren an ni lo a, hei vang hian bail dil an ngai loh thu a sawi.

Justice AS. Oka leh Ujjal Bhuyan te ṭhut bench chuan he thu hi ngaihtuahin, pawisa chheprelh leh tichingpen (PMLA) thubuaia puh, court-in inlan tura a koh chu court-a a inlan avangin hren a ni tihna a ni lo a, hei vang hian pawikhawiha puha chuan a hrana bail a dil a ngai lo a ni, an ti. SC bench hian Enforcement Directorate (ED) chuan thubuaia puh chu an man duh emaw, an hreng chhunzawm duh emaw a nih chuan court-a an inlan hnuah a hrana dilna an siam a ngaih thu leh, thu zawh fiah tura an kawl a ṭul chhan ṭha tak an nei bawk tur a ni tiin a tarlang.

SC-in PMLA dan hmanga ED-in a man theih chin a sawi fiahna chungchang hi Tarsem Lal-a'n ED-in an man avanga Punjab leh Haryana high court-a bail a dilna hnawlsak a nih avanga ngenna a theh luh vang a ni.