Vawiinah Lok Sabha seat 49-ah inthlang dawn

Lok Sabha 2024 inthlanpui neih mekah vawiin hian a thawh ngana atan state paruk leh union territory pahnih aṭanga constituency 49-ah vote thlak a ni dawn. Inthlan thawh nganaah hian Maharashtra leh Jammu & Kashmir-a constituency zawng zawngah vote thlak fel a ni tawh dawn a, Ladakh UT erawh chuan a vawi khat nan vote an thlak thung ang.

Vawiina state leh UT pariata Lok Sabha constituency inthlang tur zingah Bihar aṭangin seat panga, Jharkhand-a seat pathum, Maharashtra seat 13, Odisha atangin seat panga, Uttar Pradesh seat 14, West Bengal seat pasarih, Jammu & Kashmir leh Ladakh atangin seat pakhat ve vete an tel a ni. Election Commission of India (ECI)-in an tarlan danin Lok Sabha inthlan thawh nganaah hian candidate 695 an awm a, heng zingah hian Rae Bareli seat aṭanga chuh tur Rahul Gandhi leh Amethi seat aṭanga chuh tur union minister Smriti Irani te, defence minister Rajnath Singh te, union minister tho, Piyush Goyal leh National Conference Party hruaitu, Omar Abdullah te chu candidate langsar zualte an ni.

Candidate zawng zawng 695 atanga 227 te hi crorepati candidate (Rs. vbc. khat nei chin) niin, hei hi 33% zet a tling pha a, party mal anga lakin Samajwadi Party leh Shiv Sena party candidate zawng zawngte hi crorepati an ni a, BJP candidate 40 zinga 39 leh Congress candidate 18 zinga 15 te chu crorepati an ni bawk. Candidate zinga hausa ber hi BJP candidate, Uttar Pradesh Jhansi-a ding tur Anurag Sharma a ni a, a hausakna hi Rs. Vbc 212 niin, candidate rethei ber, J&K Baramulla-a ding tur, Mohammad Sultan Ganaie chuan Rs. 67 a nei thung. Inthlan thawh ngana atana candidate zingah hian hmeichhe candidate 82 awmin, independent candidate 291 zet an awm bawk.