Kejriwal-a’n AAP hruaitute man vek turin  BJP a cho

Swati Maliwal assault thubuai avanga a personal assistant an man avangin Delhi chief minister leh Aam Admi Party (AAP) hruaitu Arvind Kejriwal chuan AAP hruaitute nen Delhi-a BJP office-a kal an tum thu leh, BJP chu AAP hruaitute a mal mala man loa, an vaia man vek turin a cho.

Kejriwal hian BJP sorkar chu AAP hruaitute bitum leh bei rengah puhin, Swati Maliwal thubuaia a personal assistant Bibhav Kumar man a ni pawh chu BJP-in an beihna hmanrua a nih thu a sawi. Kejriwal chuan,”AAP hruaitute jail-a dah an nih zel dan hi inhmu a nih chuan hei hi BJP min beih dan a ni. Tunah pawh hian Rajya Sabha MP Raghav Chadha chu jail-a dah dan an ngaihtuah leh mek a, Saurabh Bhardwaj leh Atishi te pawh an bitum zingah hian an tel,” tiin, AAP hruaitu hlun leh MLA, MP zawng zawngte nena BJP office-a an kal tur thu leh, BJP chuan vawi khatah lo man vek tura a duh thu a sawi. Kejriwal hian AAP chu a tluk mai mai loh tur thu leh, mipui rilrua indin tlat tawh a nih avanga hruaitu awm lo pawha ding reng tawh tur a nih thu a sawi tel bawk. AAP hruaitute'n BJP office kal chilh an tum avang hian venhimna tihchhah a ni a, Delhi-a ITO metro station pawh luh leh chhuah phal lohin khar a ni bawk.

Bibhav Kumar hi Delhi-a AAP Rajya Sabha Swati Maliwal chunga hleihlenna chhuah thubuaiah man a ni a, Maliwal hian Kejriwal nen hian hun rei tak an inhriat tawh thu leh, chief minister a nih lai hian a assistant Bibhav Kumar chuan chief minister chenna inah rawng tak leh mipat hmeichhiatna hawia amah sawisaah a puh a ni. Bibhav Kumar hi Dehli police-te chuan May 18 khan manin, ni nga chhung an hreng dawn a ni.