FSSAI-in thei tihhmin nan calcium carbide hmang lo turin ngen

India rama ei leh in chi hrang hrang dinhmun endik leh vil hna thawktu, Food Safety and Standards Authority of India (FSSAI) chuan thei zuartutte leh ei leh in kaihhnawiha sumdawngte chu danin a khap 'calcium carbide' hmang lo turin a hriattir.

FSSAI hian thuchhuah siamin, thei zuartute, thei zuara sumdawnna lama inhnamhnawih zawng zawngte leh Food Business Operators (FBOs) te hnenah hriattirna a thawn chhuah tawh thu tarlangin, thei tihhminna hmun neite chuan danin a phal chin ang chauha thil ti tur leh, thei tihhmin chawp nana calcium carbide hmang lo turin a ngen a ni. FSSAI hian theihai a hun chhoh leh tak avangin thuchhuah hi an siam thar leh a, calcium carbide hi theihai tihhmin nan hman nasat a nih thu tarlangin, hei hian acetylene gas siam chhuakin, mihring taksa tana hrisel lo, arsenic leh phosphorus chemicals-te a pe chhuak leh thei a ni an ti.

FSSAI hian state tina food safety department hnenah pawh hriattirna hi thawnin, FSS Act, 2006-in dan a zam zawm lo leh bawhchhia apiangte chu na taka hrem turin a hriattir a, calcium carbide hmanga thei tihhmin chawp hian mihringah lu hai, tuihal zing tak, thak neuh neuh, chau nghulh, thil lem harsatna, luak leh vun ulcer thlengin a thlen theih thu an tarlang tel bawk a ni. FSSAI chuan calcium carbide-in a siam chhuah acetylene gas hi a thei tihhminna tura a buaipuite tan pawh a hlauhawm tel thei niin an sawi bawk.