State 3-a assembly inthlanah vote a tla ṭha

Kerala, Tamil Nadu leh Puducherry Assembly Election chu Thawhṭanni khan neih a ni a, vote a tla ṭha thawkhat hle.

Kerala (71%) :

Kerala assembly seat 140 awmna-ah chuan Thawhtanni khan inthlanna neih a ni a, candidate 1,125 awmin, an zinga 104 te chu hmeichhia an ni. Association for Democratic Reforms (ADR) survey in a tarlan danin candidate 1,125 zingah hian mi hausa tawntaw, crorepati 202 zet an awm a ni. Kerala-ah hian hriat theih chinah Thiruvananthapuram tih loh hmun dang zawngah chuan vote 50% aia sang vek a tla a ni. Vote tla zat hi chawhrualin 71% a tling phak a, hmun ṭhenkhatah result hriat theih ala nih loh vangin vote tla zat hi la danglam thei a ni.

Boaruak muanawm tak hnuaiah mipuite chuan an aiawha roreltu tur thlang chhuak turin vote an thlak. Hetih lai hian Kannur district-ah chuan police te chuan LDF worker pakhat chu manin custody-ah an dah a ni. Kannur-a Cheruthazham-ah pawh LDF worker te leh paramilitary te inkarah buaina te nau a chhuak nia hriat a ni bawk. Ernakualam, Kottayam, Idukki leh Thiruvananthapuram district-ah te chuan ruah a sur a, harsat lian tham erawh a thlen lo nia hriat a ni. Election Commission-in a tarlan dan chuan, Kerala-ah hian vote nei mi 2,60,19,284 zet an awm a ni. Polling booth 21,498 leh auxiliary polling station 148 awmin, assembly constituency 140-ah inthlanna hi neih a ni. Inthlan buaipui tur hian Polling official 1,11,897 zet ruat an ni a, general observer 51 awmin, police leh central force 52,000 te chuan venhimna lam an buaipui a ni.

Puducherry (84.11%) :

India rama Union Territory (UT) kan neih tlem te zing a mi Puducherry-ah chuan hriat theih chinah vote tla zat chu 84.11% a ni. Puducherry-ah hian Assembly seat 30 awmin, candidate 344 te chuan an chhuh a, an zinga 96 chu Independent candidate an ni. Election Commission chuan Puducherry-ah hian boruak muanawm tak hnuai inthlan zawh fel a ni a, harsatna liam tham thleng report a awm lo niiin an tarlang.

Tamil Nadu (73.85%) :

Tamil Nadu-ah pawh Thawh-
ṭannni vek khan inthlanna neih a ni a, a pumpuiah vote tla zat hi 73.85% a ni. Tamil Nadu assembly-ah hian seat 235 awmin, candidate 3,776 zet an awm a ni.

Chennai district chu vote tlak chhiatna ber niin, 60.47% vote a tla a ni. December 2015-a tui lian nasa tak avang khan political scientist te chuan ṭum dang aia vote tla a tlem an rin thu an lo sawi tawh nghe nghe a ni. Chief Minister ni lai J Jayalalithaa-a dinna R K Nagar Constituency chu vote tlak ṭhatna ber niin, 67% a tling phak. He tih lai hian R K Nagar Constituency-a Harbour-ah chuan vote 55.2% chiah a tla thung. Tui lianin a nghawng nasatna hmun Saidapet-ah pawh vote a tla ṭha lo hle.

Chief electoral officer Rajesh Lakhoni chuan Election Commission chu vote tla zat chhui chiang turin a ngen tih sawiin, vote thlak a nih hnuah vote nei zat an pung niin a sawi a ni. North Chennai Constituency chu vote nei tamna ber an ni a, South Chennai chu vote nei tlemna ber a ni thung. Chief election commissioner hlui T S Krishnamurthy chuan ṭum dang zawng aiin sum leng vel a tam niin a sawi a, vote nei pawh nasa taka an pun thu a sawi. Hmun ṭhenkhata vote tlak dan chu hetiang hi a ni : Vellore 78.5%, Villupuram 80%, Tiruvallur leh Kancheepuram-ah 71%, Cuddalore, 78.64% te a ni. Heng bakah hian Kanyakumari 66%, Ramanathapuram 68% leh Sivaganga-ah te vote 69.8 a tla ve bawk a ni.