AAP sorkarin advertisement atan nikhatah Rs nuai 16 seng

Delhi-a Aam Aadmi Party (AAP) sorkar chuan print media-a advertisement tihchhuahna atan nitin cheng nuai 16 dawn a seng ṭhin niin RTI hmanga zawhna chhannah tarlan a ni.

Ni 91 kalta chhung khan AAP sorkar hian advertisement atan cheng vaibelchhe 14.45 a seng a ni. Hengte hi print media bikah chauh a ni bawk.

AAP sorkar aṭanga advertisement dawngtu zingah hian Malayali chanchinbu pathum leh Kannada chanchinbu pakhat an tel a, hengte hi Kerala leh Karnataka state-a chanchinbu lar tak an ni.

Adverstisement atana sum tam tak a sen chungchang hi sawifiahin, AAP sorkar chuan public policy chungchang mipuite hrilhriat nana ti an nih thu a sawi. Kumin January leh April thlaa a kalpui, Odd-even scheme chungchang bikah advertisment tih nan cheng vaibelchhe 5 a sen thu a sawi bawk.

RTI hmanga zawhan hi Congress member, advocate Aman Panwar thehluh a ni. Kum 2010-a Delhi-a Commonwealth Games a thlen ṭum khan Chief Minister Sheila Dikshit-i kaihhruai, Congress sorkar chuan advertisement atan cheng vaibelchhe 23 a seng a, hei hian sawisel a lo tawk nasa tawh hle a ni.

AAP sorkarin media lama inthehlarna atana sum tam tham tak a hman chungchangah Congress chuan court-ah petition a lo thehlut tawh bawk. Petition-ah hian advertisement tam tak hi ramchhung hmun hrang hrangah tihchhuah a nih thu tarlangin, Chennai, Hyderabad, Bengaluru leh khawpui danga advertisement an tihchhuahte chu Delhi khawpuia chengte tan
ṭangkaina engmah a nei lo a ni, a ti.

AAP hian a sorkar kum khatnaah advertisement atan cheng vaibelchhe 80 a seng a, nikum khan state budget-ah advertisement bik atan cheng vaibelchhe 500 a dah bawk.

Delhi Congress chief Ajay Maken chuan AAP sorkar chu sawiselin, hnathawktu hlawh leh pension pek tur pawisa a neih loh laiin, an sorkar tihlarna tur chuan kum hmasa lam ai pawhin sum an seng hnem tawh zawk niin a sawi.