Omar Abdullah farnu-in SC-ah thubuai thehlut

Jammu & Kashmir chief minister hlui Omar Abdullah farnu Sara Abdullah Pilot chuan nikum August ni 5 aṭanga tun thlenga a in aṭanga chhuak thei loa a nuṭapa  hren zui reng a la nih avangin Supreme Court-ah thubuai a thehlut.

Sorkar laipui chuan nikum August 5 khan J&K special status pekna a ṭhiat a, hemi hnu hian UT pahnihah a ṭhen zui bawk a ni. He thil thleng vang hian sorkar laipui chuan buaina lian tham a chhuah loh nan, J&K ram chhungah sipai a dah belh bakah, J&K-a political party hruaitute chu an in chhuahsan thei loin a hreng zui bawk.

Hren zingah hian J&K CM hlui Omar Abdullah pawh telin, vawiin thlenga chhuah a la nih loh avangin a farnu Sara Abdullah chuan SC-ah thubuai a ziah luh phah ta a ni. Sara Abdullah-i'n thubuai a ziah luhah hian  constitution-a 'freedom of speech' kalhin sorkar laipui chu a chet thu a ziak lang.

Omar Abdullah hi nikum August 5 aṭanga a in chhuahsan thei loa hren a nihna chu kumin February 5 khan a tawp a,  mahse February 6 khan J&K thuneitute chuan Omar Abdullah leh Mehbooba Mufti-te hi Public Safety Act (PSA) 1978 hnuaiah thla thum chhung hren chhunzawm  leh an nih thu a puang. Nikum September 16 khan Omar-a pa, Farooq Abdullah pawh he PSA hnuaiah tho hian hren a lo ni tawh bawk.  

Public Safety Act (PSA) 1978 hnuaiah hian mipuite hnena a dik lo zawnga thu thlen leh ram tana him lo zawnga chetna awm theih venthawn thilah kum khat thleng mi hren theih a ni.