Vawiin-ah Assembly inthlan result puang dawn

Vawiin hian state pali leh Union Territory pakhata Assembly inthlan result puan a ni dawn.

Assembly inthlan neihna hi Assam, West Bengal, Tamil Nadu, Kerala leh Puducherry-te an ni. Vawiin hian vote tla-te chhiarin result hi puan a ni nghal dawn a ni.

Election Commission official chuan vote hi zing dar 8 aṭanga chhiar ṭan niin, tlai dar 3-ah chhiar zawh hman beisei a nih thu a sawi. Postal ballot-te chhiar hmain, darkar chanve hnuah EVM vote-te chhiar chhunzawm a ni ang.

Kum 2011 Assembly inthlanah khan assembly seat 243 awmna, Tamil Nadu-ah hian AIADMK leh a thawhpui ten seat 203 an la ni. AIADMK hian party malin seat 150 a la a, DMDK-in seat 29, DMK-in seat 23, CPM 10, Congress 5, PMK 3, MMKA 2, Puthiya Tamilagam (PT) 2 leh All India Forward Bloc (AIFB) in seat 1 an la a ni.

Kerala state-a assembly seat 140 awmah, kum 2011 inthlanah khan Communist Party of India (CPI) chuan seat 13 lain, Communist Party of Indian (Marxist) (CPM)-in 45, Indian National Congress (INC) 38, Janata Dal (Secular) JD (S) 4, Kerala Congress (Jacob) (KEC)(J) 1, Kerala Congress (M) (KCM) 9, Kerala Congress (B) KEC(B) 1, Kerala Revolutionary Socialist Party(Baby John) (KRSP) 1, Muslim League Kerala State Committee (MUL) 20, Nationalist Congress Party (NCP) 2, Revolutionary Socialist Party (RSP) 2,Socialist Janta (Democratic) (SJD) 2 leh Independent (IND) candidate-in seat 2 an la.

West Bengal-ah seat 294 awmin, kum 2011 assembly inthlanah khan rorellai Trinamool Congress chuan seat 184 a la a, CPI(M) in seat 40, Congress 42, CPI 2, All India Forward Block 11, Revolutionary Socialist Party 7, Samajwadi Party 1, Gorkha Janmukti Morcha 3, Democratic Socialist Party 1, Socialist Unity Centre of India 1 leh independent MLA 2 an awm a ni.

Assam Legislative Assembly, seat 124 awmnaah hian kum 2011 inthlanah khan Congress party chuan seat 78 a la pha a, amah hnaih ber tu Assam United Democratic Front (AUDF) chuan seat 18 lain, Bodoland Peoples Front-in 12, Asom Gana Parishad (AGP) 10, BJP 5, Trinamool Congress 1 leh independent candidate-in seat 2 an la.

Puducherry union territory-ah hian assembly seat 30 a awm a, All India N.R. Congress (AINRC) chuan sorkarna chelh mekin kum 2011 inthlanah khan AINRC hian seat 15 a la a, Indian National Congress (INC) in seat 7, AIADMK 5, DMK 2 leh independent-in seat 1 an la.

Inthlan neihna state panga-a mipui ngaihdan lak hnuhnung ber, Thawhṭanni tlaia tihchhuahah chuan state hrang hrangah hian rorellai party-te an che ṭha tawk lo tura ngaih a ni. West Bengal-a rorellai, Trinamool Congress chuan sorkarna siam chhunzawm leh tura rin a nih laiin, a dang pali-ah chuan sorkarna siamtu party an inthlak danglam vek rin a ni.

Assam state-ah chuan kum 15 zet Congress party in ro a relna titawpin, BJP chuan a ṭum khatna atan sorkar a siam ve thei dawn nia rin a ni. Kerala state-ah pawh rorellai Congress party hi a chak zo dawn lo nia tarlan a ni bawk.

West Bengal-ah Chief Minister Mamata Banerjee kaihhruai Trinamool Congress chuan a term hnihna atan a sorkar leh rin a ni a, mahse Tamil Nadu-ah chuan CM Jayalalithaa-i kaihhruai AIADMK leh thawhpuite chuan chuan DMK leh Congress thawkdun an phak loh rin a ni bawk.