Repo rate leh reverse repo rate thlak lo

Reserve Bank of India governor Shaktikanta Das chuan nimin khan ram chhunga pawisa leng vak thununtute zinga mi, repo rate leh reverse repo rate chu a hmaa siamsa kha la hman a nih dawn thu a sawi.

Das chuan financial year hman mek kum 2020-2021 atana real GDP chu 9.5%-a a hniam a rin thu a sawi a, repo rate leh reverse repo rate chu 4.0% leh 3.35% a la hman tur a ni ang. Nimin khan Monetary Policy Committee meeting neih a ni a, hei hi committee dinthar hnua meeting an neih hmasa berna a ni.

Meeting zawhah hian Das chuan webcast hmangin thu a sawi a, Covid-19 vangin India ram economy dinhmun chu a tlakhniam thu sawiin, hripui leng vanga hna thawh mumal theih loha hun rei tak a awm tawh avangin nitina inhlawhfa leh mi tam takin harsatna an tawh thu a sawi. Das chuan nakkum January-March quarter-ah India economy chuan ziaawm lam a pan chhoh leh a rin thu a sawi bawk.

Monetary Policy Committee-ah hian Das bakah, prime minister Narendra Modi-a economic advisory council member Ashima Goyal, National Council for Applied Economic Research-a senior advisor Shashanka Bhide, Indian Institute of Management, Ahmedabad-a accounting professor Jayanth Varma, RBI deputy governor Michael Patra leh RBI executive director Mridul Saggar-te an awm a ni.