Lok Sabha inthlan thawh ngana vote thlak zawh a ni

Lok Sabha 2024 inthlanpui thawh ngana chu nimin khan state paruk leh Union Territory pahniha constituency 49-ah neih a ni a, West Bengal hmun ṭhenkhatah buaina tenau chhuak a awm tih lohah chuan boruak muanawm tak hnuaiah inthlanna neih zawh a nih thu Election Commission of India (ECI) chuan an tarlang. Hriat theih chinah vote tla zawng zawng hi 47.53% a ni.

Bihar Lok Sabha seat 40 aṭanga seat pangaah vote thlak a ni a, heng constituency pangaah hian vote nei mi nuai 95 chuang awmin, candidate 80 an awm. Tlai dar thum thleng khan 45.33% vote a tla.

Jharkhand-a Lok Sabha seat 14 awm aṭanga seat pathumah nimin khan vote thlak a ni a, heng constituency pathumah hian vote nei mi nuai 58 chuang awmin, candidate 54 an awm bawk a ni. Hriat theih chinah 53.9% vote a tla tawh.

Maharashtra-ah hian Lok sabha seat 48 awmin thawh nganaah hian seat 13-ah vote thlak a ni a, heti hian seat zawng zawngah vote thlak kim a ni tawh. Vote nei mi vbc. 2 chuang an awm a, candidate 264 an awm bawk. Polling centre pawh 24,553 zet siam a ni. Maharashtra-ah hian vote tla che berin, 38.77% vote a tla tawh a ni.

Odisha-a Lok Sabha seat 21 zinga nimina inthlang seat pangaah hian vote nei mi nuai 79 an awm a, polling booth 9,162 siam a ni. Candidate 40 an awm. Tlai lam thleng khan 48.95% vote a tla.

Uttar Pradesh-ah hian Lok Sabha seat 80 awmin, inthlan thawh khatna aṭanga thawh sarihna thlenga inthlan turin ruahmanna siam a ni a, nimina inthlan thawh nganaah hian seat 14-ah vote thlak niin, candidate 144 an awm a ni. Vote tla zawng zawng hi 47.55% a tling tawh a ni.

West Bengal-ah hian Lok Sabha seat 42 awmin, nimin khan seat pasarihah vote thlak a ni a, vote nei mi nuai 125 an awm a, candidate 88 awmin, polling station 13,481 siam a ni. West Bengal hi vote tlak ṭhatna ber niin, 62.72% a tla tling.

Jammu & Kashmir-ah hian Lok Sabha seat panga awmin, nimin khan Baramulla seat-ah vote thlak a ni a, J&K-a Lok Sabha seat zawng zawngah vote thlak kim a ni ta a ni. Voter nuai 17 chuang an awm a, candidate 22 awmin, heng zinga mi 14 hi independent candidate an ni. J&K-ah hian hriat theih chinah 44.9% vote a tla tawh.

Ladakh union territory hi Lok Sabha constituency zau ber a ni a, 2019-a UT-a dah a nih thar niin, seat pakhat a nei a ni. Voter nuai 182,000 an awm a, candidate panga an awm a ni. Ladakh-a vote tla hriat theih chin hi 61.26% a tling tawh a ni.